各位親愛的朋友，
當你哋睇到我呢個E-mail的時候，我正走上咗一條不歸路 – 結婚喇！
May 17 2006. The Wayfarers Chapel, Los Angeles USA.
有啲朋友可能會覺得好突然，有啲朋友甚至會問“同邊個結? 仲有邊個哎! 其實多年來,同Janet溫溫馨馨, 吵吵鬧鬧, 反反復復, 小弟已恨“嫁”, 恨咗好多年. 心身疲倦, 早已離不開對方. 有啲朋友會懷疑我同Janet係咪有咗而急急腳結婚。其實我都好想，可惜仲未有呢個福氣. 而急, 都唔算太急, 三月決定, 五月Action, 大把時間, Just in the right time do the right thing.
個多月前，決定入冊後．曾誠意邀請好友Gareth 及女友Michelle來L.A.見小弟最後一面．In Fact, 當時佢哋除咗嘛大個口,一臉震驚外，原來最擔心嘅問題唔係使費，而係 “大佬，你真定假！？＂“Earnest哥你做事一貫難以捉摸，重飄忽過ＨＫ恒生指數．食飽無事做，欏條命來玩，我地玩唔起．唔好帶壞我Gareth添！”…. Oh! My god! Gareth兄要壞, 使我帶？女人，你真navie！
有朋友會問，李兄，外面嘅世界一大片森林，咁多樹木．點解要早早收皮? 你估我好想咩！但睇住自己個肚腩跟隨住年紀不斷正比例上漲，我只好面對現實，蘭桂坊或喜喜，我已多次食白果，嗰度已經唔係我嘅世界．一個人嘅生活，雖然有時精彩，一大片森林，咁多樹木，可惜都係外面嘅世界，心靈上始終有一絲嘅寂寞同空虛．依家，搵到一棵完全屬於自己嘅樹，就算肥咗啲, 煩咗啲, “噚” 咗啲. 但卻可以有一種家嘅感覺．我諗呢個就係the difference between “House” & “Home”．你話我犯賤？有邊個麻甩佬唔係犯賤？女人，can’t live with it, can’t live without it!
亦有啲朋友，特別係老死Chai, 會對我埋怨，點解要去L.A.，點解要去美國。由馬來西亞去美國好‘Q’ 麻煩！….. 三年前我家姐同Sam 喺LA 嘅Wayfarers Chapel 結婚。 家人嘅感覺好好，好難忘。 當時就希望幾個細佬都能喺同一個教堂埋單。所以Chai哥 你只能怪自己唔好彩。鬼叫我同Janet由你而認識, 如果唔係你, 我兩唔會有今日嘅下場. 只要我同Janet 結婚, ‘跣’人‘跣’到底，送佛送到西，無論天涯海角, 你老兄弟都要浦頭. Therefore, you don’t have choice, it’s a “Must”!
有啲朋友，對小弟呢種野性不羈嘅人步入教堂嗰一刻嘅心情，十分好奇．老實講，我都好想知道．因此千叮萬囑Janet步入教堂時行慢啲，俾我多啲時間去感受一下．Janet對我呢一個要求回應as usual: “你唔好發顛啦＂不過都應承咗．如果當日Janet步入教堂後，神父可以俾我三分鐘時間, 用支筆當場記錄下心情，咁就一定萬無一失．Janet 又係個句:“你唔好發顛啦＂
同Janet相處多年，呢幾個星期正式一齊同住．原來一個女人竟然有幾噸重嘅SK-II，Fancl House，搞到屋企突然細咗幾百尺．最大鑊係，家中多咗好多動物…. 好多貓…. 好多無嘴貓…. 搞到屋企變咗Hello-Kitty Land． 由一入門口對拖鞋，到書房嘅抬燈，睡房嘅鬧鐘，床鋪，洗手間嘅牙刷，廁紙．廚房嘅碗碟筷子，餅乾個盒同裏面嘅餅乾！全都係呢隻貓! 真想一一煉死佢哋．估唔到小弟咁嘅麻甩佬竟然會落到如此下場，同呢隻發瘟無嘴Hello -kitty過人世．
同Janet喺結婚前嘅最後一個談判．小弟被迫發咗好多誓．回想一下，幾年來我對Janet做嘅最多就係發誓．大大話話成百上千個．衣食住行或任何可以想像到嘅，都會叫我發誓，嚴重嘅：要愛她，唔好呃她．．．輕微嘅：小便後把廁所板放低．．．日日都要簽生死狀，感覺上anytime都要同霍元甲打擂臺一樣．我肯定係世上發誓多過食生菜嘅人．老實講，如果發誓work嘅話，小弟一早就瓜咗啦！Janet真可愛！
最後她問我有咩臨死遺願．我提出可否入監後保留小小生活私人空間，或精神上嘅私人空間．睇到呢度，可能有啲已婚嘅朋友忍不住偷笑，笑我白癡，思想簡單．話明 “結婚” ＝ “終生監禁” ＝ “無自由”．．．又何來一片私人空間呢？鬼唔知！只不過領咗嘢，心理上想攞番點點安慰罷了．
這幾天，某啲Dragonair嘅朋友可能喺Mail Box收到 “My life is Over” 嘅紅色小卡片．放心呢個並唔係 ‘炸彈’．有朋友曾經好希望我結婚擺酒嘅日子．一來有翅食，二來可名正言順隊冧我，又可以識下Janet啲靚女姊妹. Unfortunately 我哋唔會擺酒．因為小弟向來討厭傳統,加上當年喺袋鼠國讀書時期打酒樓工，做過太多酒席，咀咒過太多新人，發過毒誓自己若好彩有人要，都絕不擺酒．加上份人硬頸．用咗好多口水搞掂兩邊父母．子女結婚對佢哋來說係一個結束，對我哋來說係一個開始．所以我倆只希望同最親嘅家人同朋友分享，無興趣對任何其他姨媽姑姐作儀式上嘅交代，追求簡單而神聖．可能Janet同我企得好硬，擺到明Either My way or No way! 老爸又係一個鍾意清靜，討厭應酬嘅人, 簡單來講係個唔食吃人間煙火嘅小龍女(男裝版). 對我同Janet嘅安排，舉腳贊成．兩位老母吹我唔漲，拉我哋唔長．所以，各位朋友想齊齊飲返杯，將來大把機會．
兩個星期前，LA嘅細佬出咗啲交通意外．我同媽媽第一時間飛過去處理一啲事情．喺L.A.嗰一星期，媽媽和我非常擔心，非常疲倦．媽話我知好想爸爸過去陪她, 原來她們吵吵鬧鬧幾十年, 最愛的不是子女而始終是老爸. 嗰個星期我日日都好掛住Janet, 日日都需要聽到佢嘅聲音．佢話我知，當時我喺電話裏嘅聲音好‘冧’，返到ＨＫ後個樣都好‘冧’，幾年來從未如此連續 ‘冧’過超過一星期．簡直有啲受寵若驚．原來喺我最傷心嘅時候，就係佢最開心嘅時候．死未！回想起，自己都有啲冧到頂自己唔順，好想睇睇自己個 ‘冧’樣．
原來感情豐富嘅人都好脆弱，人喺最無助時，最崩潰時，先會深深體會到愛與被愛嘅感覺，先會深深體會到愛與被愛嘅需要．
朋友們，我走了，呢個係一條冇U Turn嘅不歸路，我唔會望返轉頭．祝福當然好，只要冇人咀咒，已好心滿意足. 若然各位朋友,可以繼續花天酒地, 享受外面嘅世界. 我喺裏面會為你祝福, 會好安慰!
E. Li 6 May 2006
